بوسطـــــــــــــــه

مع اني ما بحبش أكتب حاجه رومانسيه وماليش خلق أقرا حاجه رومانسيه بس

أحـــــــب ألفت نظرك بس إن النهارده يوم مهم أوي ..لا لا لا لا..دا أهم يوم.فات شويه حلوين علي أول يوم عرفتك فيه وشويه أحلي من يوم ما حبيتك ...فاكـــــــــر؟؟؟ إمبارح ركبت العربيه وفتحت الشباك..سبت الهوا ياخد وشــــي وشيلته كلام كتير أوي ليـــــك..وقعدت أفتكر وأفتكر...كنت حـــــاسه إن روحــــي طايره ..طايره أوي

دلوقتــــي وأنت ف الجزيـــــره البعيده ومش بعيده..اللي ما فيهاش موبايل ولا تليفون أكلمك فيه...يا تري عامل ايه؟؟؟ لسه بتحبني زي زمان؟؟ أكتر؟؟ اقل؟؟

إنت واحشـــــني أوي...وعلي رأي جدتي" ربنا يقرب البعيد" هيه يا رب

لما كنـــا صغيرين شويه..ما كناش بناخد بالنا من الوقت ..كان بييجي ويروح ..فاكر أيام خناقتنا الكتير؟؟ فاكر لما كنت بتعمل عليا راجل؟؟ فاكر؟؟ فاكر؟؟


النهارده يوم مهم أوي..وناعم زي الحرير . لما بحط راسي ع المخده وأفتكره بحس ان الحياه بتتزحلق علي خدي.....جميل أوي ان الواحد يكون له يوم مهم ف حياته ...أنا عاوزه أقولك شكرا أنك عملتلي اليوم دا وزودت لعيني حاجات حلوه أوي ومهمه

النهارده أحتفلت باليوم دا مع نفسي ورقصت معاك تانجو...شفتني؟؟؟ انا كنت حاسه انك شايفني
فاكر التانجو؟؟ مشروعنا عشان نقرب من بعض؟؟؟

إمبارح قريت الكلام الحلو أوي اللي أنت كتبتهولي أخر مره ..قريته كتييييييير"
ــــــــــــــــــــــــــــــــــــــــــــــــــــــــــــــــــ
والنبي

فاكره مزيكة النشره الجويه بتاعة أخبار تسعه وأحنا صغيرين؟؟
خليكي شبهها كدا باب أو وعد بالنوم
وأنا صغير كنت متخيل إن فيه ألبوم للكلام وإن كل كلمه ليها صوره شبه اللي ف ألبوم صوري اللي مبشوفوش كتير وحتي دلوقتي ساعات ودني تلقط من وسط الجمل الكتير كلمه فأحس أنها شبهك أو أحس اني فرحان إني سمعت الكلمه دي
يعني مثلا( ميه بيضا ) أو (هناك) أو (شويه) ء
شايفه الشين اللي ف أول شويه دي. خليكي زيها كدا حضن م الدوشه والعالم اللي برا
وأنا شبه كلمة " ساعات" زيّ زي كل مراكب أمشير
ساعات أبقي عاوزك تهنينه وتغنيها لي كمان وأنا بنام. وسعات أبقي عايزك حجات كتير وجري وتنطيط وسعات أبقي عايزك تعرفيني أنا عايزك إيه؟؟
وكتير بحس إن كلمة (ساعات) هتاكل لساني بكل الكلام اللي عليه
ومش هتسيب غير بس
خليكي
خليكي
ـــــــــــــــــــــــــــــــــــــــــــــــــــــــــــــــــــــــــــــــــــــــ

شايف كلمة" نشرةالجويه "اللي أنت كاتبها دي أنا حسيت وانا بقراها ان قلبي دفي..وكلمة " والنبي" حاسه انها حضناني كدا...ومش هقولك كلمة " خليكي" عملت فيا ايه

واحشني قعدتك معايا وتعليقاتنا علي كل حاجه...بالحق ...شفت إعلانات ميلودي....

عاوزه أشوف إبتسامتك واسمع تعليقك وانت بتشوفه


كمان بالحق............................. ولا أقولك....بلاش ..أنا اصلي مكسوفه جدا
وحاسه ........

المهم عشان ما أطولش عليك..الحكايات أصلها ما بتخلصش وانا ما بشبعش من الكلام معاك..أنا بس عاوزه أقولك
بحبك

واحشني

كل أهم يوم وانت طيب